“Në korridoret që dikur ruheshin sekretet më të errëta të diktaturës e çdo zë survejohej, sot dëgjohen hapat dhe kureshtja e turistëve nga e gjithë bota. Muzeu “Shtëpia me Gjethe” është dëshmi e gjallë se e shkuara historike mund të kthehet në një atraksion turistik e kulturor për qindra vizitorë.”
Nga kurioziteti për të njohur historinë e Shqipërisë, deri te dëshira për të kuptuar se si funksiononte një nga mekanizmat më të fortë të survejimit gjatë regjimit komunist, turistët po e përfshijnë gjithnjë e më shumë Muzeun Kombëtar “Shtëpia me Gjethe” në itinerarin e tyre.
“Në fakt ishte ideja e babait tim. Ai është shumë i interesuar për Bashkimin Sovjetik dhe mënyrën se si funksiononte dikur. Prandaj donte ta vizitonim këtë muze dhe ishte vërtet shumë interesant. Mësuam se si jetonin njerëzit në atë kohë dhe ishte gjithashtu mjaft prekëse, madje pak e trishtueshme, sepse pamë, për shembull, se kishte spiunë. Po, ishte vërtet shumë interesante.”
Vizitorët ndalen në çdo hapësirë të muzeut, duke ndjekur rrëfimin e dokumenteve, pajisjeve të përgjimit dhe dëshmive që tregojnë një periudhë të errët të historisë së vendit.
“Shqipëria ka një histori shumë të pasur, ndaj po vizitojmë vende të ndryshme për të njohur kulturën dhe historinë e saj, veçanërisht të kësaj zone. E kisha parë këtë muze në rrjetet sociale edhe më parë, prandaj erdhëm ta vizitonim nga afër. Mendoj se Shqipëria ka një trashëgimi historike shumë të pasur dhe një histori të gjatë, me gjithçka që populli i saj ka përjetuar ndër shekuj.”
Interesi në rritje shtuar përgjegjësinë e drejtuesve për ta bërë këtë eksperiencë edhe më të plotë.
Por misioni i muzeut nuk kufizohet vetëm te vizitorët e huaj. Një nga objektivat kryesorë mbetet afrimi i të rinjve shqiptarë me këtë pjesë të historisë, përmes aktiviteteve kulturore dhe edukative që organizohen gjatë mbrëmjeve të verës, duke e kthyer muzeun në një hapësirë dialogu mes së shkuarës dhe brezave të rinj.
Në një sezon ku kultura dhe turizmi bashkohen, ky muze mbetet një ndalesë e rëndësishme e turistëve që kërkojnë më shumë sesa plazhe dhe peizazhet e Shqipërisë.
