Një 38-vjeçar, i cili shpërndante lëndë narkotike kokainë në qytetin e Fierit është vënë në pranga. Gjithashtu ai është gjobitur me 55 000 lekë gjobë pasi drejtonte automjetin në gjendje të dehur.
Sipas njoftimit të policisë, në pranga ka rënë shtetasi E. K., 38 vjeç, banues në Lushnjë.
Ai u ndalua për verifikim në aksin rrugor “Fiershegan-Krutje” nga shërbimet e Policisë Rrugore.
Nga testi i bërë rezultoi se 38-vjeçari e drejtonte automjetin, në efektin e alkoolit, dhe nga verifikimet e mëtejshme rezultoi se nuk e kishte pajisur automjetin, me siguracion. Për të dyja shkeljet u ndëshkua me masa administrative, në total 55 000 lekë gjobë.
Më tej, iu kryen kontrolle në automjet dhe në banesë, ku iu gjetën në total 33 doza lënde të dyshuar narkotike Kokainë, dhe 1 peshore elektronike.
“Në përfundim të veprimeve procedurale të kryera në kuadër të operacionit të koduar “Penalitetet”, specialistët e Sektorit për Hetimin e Narkotikëve arrestuan shtetasin E. K., për veprën penale “Prodhimi dhe shitja e narkotikëve””, njoftuan blutë.
