Drejtuesja politike e qarkut të Gjirokastrës, Mirela Kumbaro, në 35-vjetorin e themelimit të Partisë Socialiste, vlerësoi kontributin e themeluesve dhe të gjithë atyre që kanë qenë pjesë e rrugëtimit të kësaj force politike ndër vite, duke theksuar rëndësinë e ruajtjes së vlerave dhe parimeve mbi të cilat u ngrit Partia Socialiste.
Ajo theksoi se ky përvjetor shërben jo vetëm për të nderuar të shkuarën, por edhe për të reflektuar mbi përgjegjësitë dhe sfidat që sjell e ardhmja.
Kumbaro: Të gjithë jemi këtu për t’i bërë gjërat si duhet, edhe më mirë, në atë që vjen. Ka një moment kur na duhet një reflektim se asgjë nuk ra prej qiellit. Gjithçka ka nisur me disa gra dhe burra që këtu, në qarkun tonë, kanë hedhur rrënjët e themelimit të Partisë Socialiste të Shqipërisë. Qarku i Gjirokastrës i ka dhënë jetë themeluesit dhe kryetarit historik të Partisë Socialiste, Fatos Nano.
Sot është një moment i rëndësishëm për të kuptuar që këmbët duhet t’i mbajmë te rrënjët, te toka, te ajo tokë që sot është kthyer në zhvillim dhe ekonomi. Sot është moment për të falënderuar këtë brez që jo vetëm e themeloi Partinë Socialiste, por sepse diti të krijojë terrenin e duhur për të sjellë breza të tjerë. Shifrat me të cilat PS ka të drejtë të krehohet në Gjirokastër janë më të lartat në Republikë. Jo vetëm në qarkun e Gjirokastrës.
Kumbaro, u ndal te transformimi që ka pësuar vendi gjatë viteve të fundit, duke theksuar se besimi i qytetarëve te Partia Socialiste lidhet me rezultatet konkrete dhe zhvillimin e prekshëm në jetën e përditshme.
Kumbaro: Mbi 76% i besojnë Partisë Socialiste sepse e shohin dhe e prekin çdo ditë se ato fjalë që dikur nuk ekzistonin, agroturizmi, turizmi, ekonomia, sot janë realitet. Gjërat nuk shkojnë asnjëherë pa debat, sepse gjithmonë do të ketë debat. Kjo forcë politike demokracinë nuk e ka hipokrizi, e ka realitet. Kjo forcë politike ka ditur të bëjë debate publike dhe do të vazhdojë t’i bëjë edhe sot që flasim, edhe me protesta, sepse Shqipëria është një vend i lirë, një vend demokratik dhe projektet e zhvillimit kalojnë pikërisht përmes debatit.
E tillë ka qenë çdo iniciativë që ne kemi marrë, por që sot e shohim si një realitet që gjeneron ekonomi, i bën të rinjtë të kthehen dhe ka sjellë atë që dikur të gjithë e kishim vetëm një ëndërr: destinacionin kryesor të turizmit në të gjithë Shqipërinë.
