Një ngjarje e rëndë ka tronditur opinionin publik në Itali, ku një 32-vjeçare nga Kolumbia ka denoncuar se është rrëmbyer dhe dhunuar seksualisht për tre ditë me radhë në periferi të Romës.
Sipas autoriteteve italiane, gruaja kishte mbërritur në kryeqytetin italian në fillim të muajit maj. Më 19 maj, ajo ndodhej pranë stacionit hekurudhor “Termini”, ku njohu një burrë që dyshohet se e mashtroi me pretekstin e blerjes së lëndëve narkotike.
Pak më vonë, 32-vjeçarja dyshohet se u rrëmbye dhe u dërgua në një ndërtesë të braktisur në zonën Tor Cervara, në lindje të Romës.
Sipas dëshmisë së saj dhe hetimeve të policisë, ajo u mbajt kundër vullnetit të saj për rreth 72 orë. Gjatë kësaj kohe, gruaja pretendon se është dhunuar seksualisht në mënyrë të përsëritur nga një grup burrash, ndërsa autorët i kanë dhënë edhe substanca narkotike dhe e kanë kërcënuar me jetë.
Autorët dyshohet gjithashtu se i kanë marrë telefonin celular dhe portofolin.
Pas tre ditësh, gruaja arriti të arratisej dhe u gjet në gjendje të rëndë nga një shofer kalimtar, i cili e transportoi menjëherë në spitalin “Casilino”. Mjekët konstatuan plagë dhe dëmtime të përputhshme me abuzim seksual dhe njoftuan menjëherë policinë.
Hetimi i policisë italiane çoi brenda pak ditësh në identifikimin dhe arrestimin e pesë të dyshuarve, të cilët akuzohen për përdhunim në grup me rrethana rënduese. Në të njëjtën kohë, autoritetet vazhdojnë hetimet e tyre për të identifikuar individë të tjerë që mund të jenë të përfshirë në këtë rast.
Në ndërtesën ku dyshohet se mbahej gruaja, autoritetet identifikuan gjithsej 22 persona që banonin ilegalisht në vend. Procedurat administrative të dëbimit u iniciuan për 11 prej tyre, përfshirë pesë burrat e identifikuar nga viktima si autorë të tmerrit që ajo përjetoi.
/vizionplus.tv.
