Këtë sezon veror kriza e punëtorëve do të jetë edhe më e ndjeshme, përballë shifrave në rritje të turistëve që priten. Blerim Norja sipërmarrës në Durrës, thotë se zona turistike e Golemit e më tej ende në këtë fillim Maji nuk është e plotësuar me stafin e nevojshëm.
“Zona në Golem, Qerret e më tej mund të them se ka një mangësi stafi në nivelet prej 40%, ndërkohë që numri i turistëve është më i lartë këtë pranverë se një vit më parë. Janë hotele dhe restorante të cilat kanë një sezonalitet dhe nuk janë në kapacitet të plotë për gjatë gjithë vitit”, tha Norja në emisionin E-ZONE në Vizion Plus
Edhe pse pagat janë rritur për çdo profesion në zinxhirin turistik, sërish vështirësia është e madhe për të gjetur punëtor
“Një sanitare sot në Durrës paguhet 600 euro. Një kamerier nis nga 500 euro për të vijuar edhe mbi 1000 euro në muaj, në varësi të eksperiencës. Janë paga për 8 orë punë. Një kuzhinier minimalisht nis me 1500 euro në muaj. Mund të them se janë paga mbi mesataren e tregut”, tha ai.
Sipas sipërmarrësit Norja tregu vërtet vuan nga emigrimi, por ka një tendencë të shqiptarëve që po kthehen.
“Në hotelin tim kam pesë raste të punonjësve që emigruan dhe u kthyen sërish. Puna në turizëm tashmë ofron një pagë të mirë për një jetesë pranë familjes. Raste tilla ka plot edhe tek kolegët e mi”, tha Norja
Gradualisht po bie dhe teoria se turizmi është një punë sezonale. Bumi turistik jo vetëm ka zgjatur sezonin, por efekti tjetër është që puna në këtë sektor të shihet si profesion dhe jo si punë sezonale. /vizionplus.tv
