Dusan Vlahoviç ka nisur zyrtarisht një kapitull të ri në karrierën e tij. Sulmuesi serb është prezantuar si futbollisti më i ri i Beshiktasit, pasi mbylli aventurën e tij me Juventusin.
26-vjeçari ka firmosur një kontratë 3-vjeçare me klubin turk, ndërsa sipas raportimeve do të përfitojë 7.5 milionë euro në sezon. Në momentin e firmës, Vlahoviç raportohet se ka përfituar gjithashtu rreth 10 milionë euro bonus.
Sulmuesi kishte pritur një ofertë nga një klub i madh evropian, por në fund zgjodhi transferimin në Turqi. Në vendimin e tij ndikim të rëndësishëm ka pasur edhe trajneri Vincenzo Italiano, i cili kishte insistuar për transferimin e tij.
Vlahovic mbërriti në Stamboll mes entuziazmit të tifozëve të Besiktasit dhe, pasi kaloi me sukses testet mjekësore, firmosi kontratën me klubin turk.
Para largimit nga Torino, sulmuesi serb i dha lamtumirën Juventusit përmes një mesazhi emocionues në rrjetet sociale, ku falënderoi klubin, shokët e skuadrës, trajnerët dhe tifozët për vitet e kaluara me fanellën bardhezi.
“Rrugëtimi im me Juventusin përfundon”, shkroi Vlahoviç, duke kujtuar vitet e tij në Torino, golat, fitoret, momentet e vështira dhe lidhjen që krijoi me qytetin dhe tifozët.
Në fund të mesazhit, sulmuesi e mbylli me një frazë simbolike për klubin që la pas: “Erdha me dëshirën për t’u bërë pjesë e historisë së Juventusit. Largohem duke e ditur se Juventusi do të jetë përgjithmonë pjesë e imja. Faleminderit, Juve. Faleminderit, Torino. Fino alla fine.”
