Një zjarr i përmasave të mëdha që përfshiu masivin pyjor në fshatin Lugaxhi, në Labinot Mal të Elbasanit, është vënë nën kontroll pas disa orësh ndërhyrjeje intensive nga forcat zjarrfikëse dhe strukturat e tjera të angazhuara në terren.
Flakët përshkuan një sipërfaqe të konsiderueshme me bimësi, ndërsa përhapja e tyre rrezikoi edhe disa banesa në zonë. Ndërhyrja e ekipeve operacionale bëri të mundur izolimin e vatrës dhe shmangien e përhapjes së mëtejshme të zjarrit.
Operacioni është zhvilluar në kushte të vështira për shkak të terrenit të thyer, i cili ka pamundësuar afrimin e mjeteve të rënda pranë vatrave të zjarrit. Për këtë arsye, një pjesë e konsiderueshme e ndërhyrjes është realizuar në këmbë.
Në operacion janë angazhuar dy mjete zjarrfikëse me kapacitet prej 3 tonësh secili dhe 18 efektivë zjarrfikës. Për ndërhyrjen në zonat ku mjetet nuk mund të depërtonin janë përdorur edhe pompa shpine.
Në terren kanë kontribuar gjithashtu 25 punonjës të ASHP-së, të cilët kanë ndihmuar në izolimin e vatrave dhe frenimin e përhapjes së flakëve.
Pas vënies së situatës nën kontroll, ekipet kanë vijuar monitorimin e zonës për të evidentuar dhe neutralizuar çdo vatër të mbetur, me qëllim parandalimin e riaktivizimit të zjarrit.
