Dy motrat humbin jetën tragjikisht në Lushnjë, policia jep detaje (VIDEO)
Një aksident tragjik u mori jetën dy motrave mbrëmjen e kësaj të enjteje në aksin rrugor Çukas-Delisulaj.
Florije Xhepa dhe Mirela Haskaj kanë humbur jetën pasi mjeti me të cilin udhëtonin ka dalë nga rruga dhe ka rënë në një kanal vaditës.
Mjeti drejtohej nga 53-vjeçarja Florije Xhepa.
Njoftimi i policisë:
Rreth orës 19:00, jemi njoftuar se në një kanal me ujë, në aksin rrugor rural “Delisufaj-Çukas”, kishte rënë një automjet.
Menjëherë kanë shkuar shërbimet e Policisë dhe të Zjarrfikëses, ku kanë konstatuar brenda automjetit dy shtetase të pajeta, konkretisht shtetasen F. Xh., 53 vjeçe, banuese në fshatin Çermë, drejtuese e automjetit, si dhe motrën e saj, shtetasen M. H., 50 vjeçe, banuese në fshatin Delisufaj, e cila ishte pasagjere në automjet.
Grupi hetimor ndodhet në vendngjarje dhe po punon për sqarimin e rrethanave dhe shkakut të rënies së automjetit në kanal.
