Evropa po përballet me një nga sezonet më të vështira të zjarreve të viteve të fundit.
Deri në fillim të gushtit, rreth 500 mijë hektarë tokë janë përfshirë nga flakët në vendet e Bashkimit Evropian, me Spanjën në krye të listës së vendeve më të prekura. Spanja është goditur më së shumti me 38% të sipërfaqes së djegur në BE, ndërsa Franca po përjeton një nga sezonet më të rënda të zjarreve në më shumë se një dekade
Situata ka detyruar autoritetet franceze dhe spanjolle të evakuojnë banorë dhe turistë nga zonat e rrezikuara. Në terren janë angazhuar mijëra zjarrfikës, forca ushtarake dhe ekipe emergjencash, në përpjekje për të ndalur përhapjen e flakëve.
Në Greqi, erërat e forta dhe temperaturat e larta kanë shtuar rrezikun e zjarreve, duke detyruar autoritetet të rrisin gatishmërinë në disa zona. Në Halkidiki raportohet se një vatër e madhe zjarri ka perfshirë zonën, ndërsa 15 anije kanë larguar turistët dhe vendasit.
Por alarmi nuk kufizohet më vetëm në jug të kontinentit. Vala e të nxehtit ekstrem ka përfshirë edhe Mbretërinë e Bashkuar, Gjermaninë dhe Danimarkën, duke sjellë temperatura të pazakonta dhe duke rritur ndjeshëm rrezikun e zjarreve.
Thatësira, dhe erërat e forta kane favorizuar përhapjen e shpejtë të flakëve. Pasojat pritet të jenë të rënda edhe për ekonominë. Përveç shkatërrimit të banesave dhe dëmeve në pyje e bujqësi, zjarret po godasin turizmin dhe po rrisin kostot për shërbimet publike dhe sigurimet.
Ndërkohë, tymi i dendur po rëndon cilësinë e ajrit dhe shëndetin e njerëzve në zonat e prekura.
Një verë e karakterizuar nga vapë e pazakontë dhe zjarre të fuqishme po shndërrohet kështu në një tjetër sinjal alarmi për Evropën, ku kushtet ekstreme po e bëjnë sezonin e zjarreve gjithnjë e më të gjatë dhe më të vështirë për t’u përballuar.
/vizionplus.tv
