Ekipet e shërbimit zjarrfikës kanë arritur të vënë nën kontroll flakët e përmasave të mëdha që përfshinë pasditen e sotme Pyllin e Sodës në Vlorë.
Pavarësisht lokalizimit të vatrës kryesore, strukturat përgjegjëse po vijojnë praninë në terren për të monitoruar situatën dhe për të parandaluar çdo riaktivizim të mundshëm të zjarrit.
Përmes një reagimi në rrjetet sociale, Ministri i Brendshëm, Besfort Lamallari, konfirmoi se po mbahet një kontakt i vazhdueshëm me të gjitha trupat e angazhuara në operacionin e shpëtimit.
Ministri i Brendshëm shprehu mirënjohjen e tij për të gjithë ata që u angazhuan drejtpërdrejt në përballimin e kësaj sfide mjedisore.
“Orë të vështira në Vlorë për shkak të vatrave të zjarrit në Pyllin e Sodës dhe në disa zona të tjera.
Ndjekim në çdo çast situatën në koordimin me të gjitha strukturat në terren që po punojnë për vënien nën kontroll të flakëve.
Falënderoj çdo punonjës që po përballet me këtë situatë të vështirë me profesionalizëm dhe përkushtim.
Mirënjohje gjithashtu strukturave lokale dhe banorëve vendas për angazhimin. Prioriteti ynë mbetet mbrojtja e jetës së qytetarëve, e banesave dhe e pasurisë natyrore.
Do të vazhdojmë të jemi në terren deri në normalizimin e plotë të situates”, shkruan ministri Lamallari.
