Pasuria e familjeve të pensionistëve mbetet e shpërndarë në mënyrë të pabarabartë midis Gjermanisë lindore dhe perëndimore. Si pasojë, familjet e pensionistëve në Gjermaninë lindore vazhdojnë të kenë të ardhura më të ulëta se ato në perëndim dhe kanë shumë më pak gjasa të banojnë në shtëpi në pronësi të vetë banuesve. Kjo bëhet e qartë nga të dhënat e reja të Zyrës Federale të Statistikave (Destatis).
Sipas këtyre të dhënave, familjet e personave 65 vjeç e lart në lindje të Gjermanisë kanë një të ardhur mesatare neto prej 2270 eurosh në muaj. Në perëndim, shifra është pak më e lartë, 2350 euro. Kjo përshkruan të ardhurat mesatare të familjeve që përbëhen ekskluzivisht nga pensionistë 65 vjeç e lart. Gjysma e këtyre familjeve kanë të ardhura më të ulëta, ndërsa gjysma tjetër kanë të ardhura më të larta.
Rëndësia e pensioneve
Megjithatë, ndërsa 61 për qind e pensionistëve në perëndim jetojnë në shtëpi pronë të tyre , në lindje kjo shifër është vetëm 44 për qind; rrjedhimisht, në landet federale lindore, shumica e pensionistëve (56 për qind) jetojnë në banesa me qira. Statistikanët vunë në dukje se, megjithëse banesat në pronësi ku pronarët banojnë vetë përbëjnë një pasuri të rëndësishme, ato nuk merren parasysh kur llogaritet të ardhurat.
Megjithatë, situatat e ndryshme të banimit pasqyrohen gjithashtu në burimet e të ardhurave: kështu, familjet e pensionistëve në lindje mbështeten në një shkallë më të madhe te pensionet e sigurimeve shoqërore (ligjore) dhe pensionet shtetërore. Këto përbëjnë 96 për qind të të ardhurave të familjes atje.
Në perëndim, sipas Destatis, kjo shifër është 92 për qind. Përkundrazi, pak më shumë se katër për qind e të ardhurave atje vjen nga pasuritë, si të ardhurat nga qiraja ose fitimet e kapitalit. Në lindje, kjo përqindje është e papërfillshme, vetëm 1 për qind.
Rrezik më i lartë i varfërisë për të moshuarit
Pavarësisht dallimeve strukturore në aspektin e pasurive, rreziku i varfërisë për pensionistët në lindje dhe perëndim është praktikisht identik. Në nivel kombëtar në Gjermani, sipas Destatis, 18.9 për qind e të moshuarve mbi 65 vjeç konsideroheshin të rrezikuar nga varfëria.
Në landet federale lindore, norma 18.5 për qind ishte e ngjashme me atë në perëndim, 19.0 për qind. Sipas përkufizimit të BE, konsiderohet se rrezikohet nga varfëria çdo person me të ardhura më pak se 60 për qind të të ardhurave mesatare të popullsisë së përgjithshme. /DW/
