Eksperti zgjedhor Andon Kume, i është bashkuar transmetimit maratonë në televizionin kombëtar Vizion Plus.
Gjatë bisedës me moderatoren Pranvera Borakaj, zoti Kume tha se pavarësisht problematikave të raportuara në disa prej qendrave të votimit, nuk cenohet procesi zgjedhor.
Gjithashtu ka komentuar edhe ngjarjen në Lezhë, ku bashkëshorti i deputetes demokrate Elda Hoti së bashku me një 25-vjeçar u arrestuan nga policia mbrëmjen e djeshme.
Ladi Ndoja, bashkëshorti i Hotit dhe Amarildo Jushi janë arrestuar pasi ndaluan makinën e një 46-vjeçari me pretendimin se blinte vota, por në makinën e tij nuk u gjet asnjë material kompromentues sipas policisë.
Andon Kume: Procesi është si të gjitha proceset që kemi kaluar, me ato problematikat në proces, por janë probleme që nuk besoj se në thelb cenojnë procesin zgjedhor. KQZ është në kontakt të menjëhershëm me komisionet e qendrave të votitmit që kanë probleme dhe po i asiston. Nëse do të bënim një krahasim me votimet e tjera, votimi ka nisur me vonesë, por këto nuk janë probleme që nuk cenojnë procesin zgjedhor. Ngjarja e Lezhës është konseguencë e klimës politike në Shqipëri dhe problematikave që Shqipëria ka me shit-blerjen e votës. Kemi një opozitë që është hera e dytë që ka ngritur një task forcë për mbrojtjen e votës së shqiptarëve dhe këto situata mund të ndodhin. Nuk është një situatë normale. Në makinën e bashkëshortit të deputetes është një listë zgjedhore, por kjo nuk përbën problem, ndërsa në makinën që ata kanë ndaluar nuk kanë gjetur asnjë material kompromentues.
Pranvera Borakaj: Është makina e drejtorit të arsimit në Mirditë ajo që është ndaluar.
Andon Kume: Këto janë të dhëna që kemi nga media, e cila i referohet policisë.
Agim Baçi: Ngjarje të tilla duhet të saqrohen nga policia. Për sa kohë nuk ka ngjarje të jashtëligjshme duhet të sqarohen sa më parë, që të mos ketë ndikim./vizionplus.tv
