Arrestohet një nga dy autorët e dyshuar të vrasjes së efektivit të Forcave te Nderhyrjes se Shpejte ne Shkoder, Xhulio Prela, i cili u gjet i ekzekutuar ne makinen e tij më 5 dhjetor në autostradën Lezhë-Laç.
Ky është i riu Nikoll Sherrniku, i cili ka rënë në pragat e policisë të shtunën, pas hetimit dhe kerkimit intensiv nga uniformat blu dy javë pas ngjarjes.
Ndërkohë është shpallur në kërkim ndërkombëtar bashkëpunëtori i tij, edhe ai i akuzuar për vrasjen.
Sipas policisë, shkak për ekzekutimin e 26-vjeçarit Prela dyshohet të jetë bërë një konflikt i çastit për dritat e makinës. Polici Prela po kthehej nga Shkodra për në Tiranës në orët e parë të mëngjesit, kur në autostradë atij i është bërë me shenjë nga një mjet tjetër që të ndalonte. I riu është kthyer pas duke menduar se personi kishte nevojë për ndihmë. Por, pas kontaktit me Nikoll Sherrnikun dhe shokun e tij, këta të fundit e kanë qëlluar me pistoletë, duke i shkaktuar vdekjen e menjëhershme.
Makina e policit të FNSH u gjet në një kanal buze rrugës, ndërkohë që hetuesit sekuestruan kamerat e sigurisë së disa bizneseve për të zbardhur ngjarjen.
Deri në përfundim të hetimeve dhe gjetjes së armës së krimit, Gjykata e Lezhës ka vendosur për autorët e dyshuar masën e sigurisë “Arrest me burg” për veprën penale “Vrasje me paramendim” e kryer në bashkpunim dhe “Armëmbajtje pa leje”.
