Ukraina dhe Bashkimi Europian firmosën një marrëveshje për nxitjen e prodhimit të përbashkët të dronëve, e cila parashikon kombinimin e ekspertizës së Kievit me kapacitetin industrial europian për zhvillimin e projekteve të përbashkëta dhe shtimin e prodhimit të këtyre mjeteve.
“Kemi nevojë të kombinojmë fuqitë tona. Kjo marrëveshje do të bashkojë zotësinë ukrainase me kapacitetin industrial të Europës,” u shpreh presidentja e Komisionit Europian gjatë një fjalimi në Kiev, ku shkoi në Ditën e Shtetësisë së atij vendi.
Ukraina ka firmosur ndërkohë një sërë marrëveshjesh të ngjashme me vende individuale. Gjatë samitit të NATO-s që u mbajt javën e shkuar në Ankara, presidenti Volodimir Zelenski nënshkroi tre të tilla, çka sipas tij e çoi në nëntë numrin e vendeve me të cilat Kievi ka marrëveshje për dronët. Por marrëveshja e së mërkurës është e para që do të mbulojë vende dhe kompani në territorin europian.
“Njohuria që keni fituar me dronët dhe sistemet antidron është me të vërtetë unike. Duhet ta shfrytëzojmë këtë njohuri sepse jemi të ndërgjegjshëm për kërcënimet me të cilat Europa po përballet në këtë fushë, siç janë alarmet dhe shkeljet e hapësirave ajrore të shumë shteteve anëtare,” u shpreh Von der Leyen duke iu drejtuar Zelenskit.
Presidentja e organit ekzekutiv të bllokut shtoi se BE mund t’i ofrojë Ukrainës avantazhe si kapacitet teknologjik dhe industrial me përmasa tejet të mëdha dhe objekte të sigurta për prodhimin e dronëve.
Ukraina ka zhvilluar një industri tejet të sofistikuar dronësh pasi u pushtua nga Rusia në shkurt të 2022-it. Zelenski ndërmori shumë udhëtime për promovimin e marrëveshjeve për dronët, veçanërisht në Lindjen e Mesme, ku vendet e Gjirit kanë nevojë për ekspertizën ukrainase për të zmbrapsur sulmet ajrore iraniane.
