Ministrja e Shëndetësisë, Ogerta Manastirliu ka kujtuar sakrificën e stafeve mjekësore, të cilët u gjendën në shërbim të qytetarëve që u prekën nga tërmeti i 26 nëntorit të vitit të kaluar.
Duke bërë një paralelizëm me situatën në të cilën ndodhemi sot, ministrja shprehet e bindur se me përkushtimin e bluzave të bardha dhe solidaritetin e të gjithëve, edhe kjo betejë kundër COVID do të fitohet.
“Si sot një vit më parë ekipet tona mjekësore na dhanë një provë të jashtëzakonshme force e vetmohimi ndaj një tragjedie që goditi në zemër vendin tonë, tërmeti i 26 Nëntorit. Sot jemi në mes të një tjetër sprove, që kërcënon shëndetin dhe jetën por me përkushtimin dhe shpirtin e sakrificës të mjekëve dhe infermierëve tanë dhe me durimin e solidaritetin e të gjithëve, do ta fitojmë së bashku edhe këtë luftë.”
Nga tërmeti 6.4 ballë që goditi vendin një vit më parë, 51 persona humben jetën, qindra të tjerë u plagosën, ndërsa mijëra mbeten të pastrehë.
