Dy të rinj janë ekstraduar nga Roma dhe Milano drejt Shqipërisë pasi ishin të shpallur në kërkim ndërkombëtar. Sipas njoftimit të policisë, një prej të ekstraduarve, Igli Memaj 32 vjeç, është pjesë e grupit që kanë qëlluar me armë zjarri në drejtim të lokalit ku ndodhej Inez Hajrulla në 5 maj të vitit 2019.
Inez Hajrulla, më herët, ka qenë shënjestër e një shpërthimi me tritol në Vlorë ku mbeti i plagosur rëndë duke humbur gjymtyrët.
“Më 10 maj të vitit të kaluar 5 persona, një prej tyre 32-vjeçari i ekstraduar nga Roma, qëlluan me armë zjarri në drejtim të një lokali ku shënjestër ishte Inez Hajrulla por i plagosën kalimtarin 63-vjeçar Dajko Cenodemaj. Në nëntor të vitit të kaluar për të njëjtën ngjarje policia arrestoi shtetasit Daut Elmazi, 25 vjeç, banues në Vlorë; Albano Goxhaj, 24 vjeç, banues në Fier; Dejvison Serjani, 28 vjeç, banues në Tiranë; Ardjan Ahmeti, 26 vjeç, banues në Tiranë.”
Për këtë vepër penale, Igli Memaj ishte dënuar me burg nga Gjykata e Vlorës, por nuk e kishte vuajtur dënimin dhe prandaj u ekstradua.
Po këtë të martë u ekstradua edhe shtetasi me inicialet L. S., 31 vjeç, të cilit në vitin 2016 i janë gjetur në makinë 6 kg e 615 gram kanabis. Gjatë operacionit të policisë, ai është larguar menjëherë, por ndaj tij është caktuar masa e sigurisë “Arrest me burg”.
