Kryeministri Edi Rama, gjatë aktivitetit për 35-vjetorin e themelimit të PS-së në qarkun e Beratit, është ndalur sërish te Zvërneci.
Rama tha se Zvërneci është zonë e mbrojtur e kategorisë së pestë, por kjo nuk do të thotë se investimi aty nuk mbron biodiversitetin.
Ai tha se investimi në Zvërnec është një investim që do të sillte rritje ekonomike për Shqipërinë, prandaj vende të tjera janë bërë xheloze.
“Zvërneci ka qenë që në krye të herës zonë e mbrojtur e kategorisë së pestë. Protestohet për çfarë? Debati real sot nuk është a do të mbrohet apo jo biodiversiteti, pasi kjo është pjesë e pandashme e punës sonë. Debati sot nuk është a do të hiqet apo do të mbetet si peizazh i mbrojtur. Debati sot është më i thjeshtë se kaq. Çfarë Shqipërie do të kemi ne pas 15 vjetësh? Si do ta rrisim ne Shqipërinë ekonomikisht, si do ta rrisim Prodhimin e Përgjithshëm Kombëtar, ndërkohë që kemi industrinë kombëtare të turizmit?
Turizmi është një industri që zhvillohet nga ato vende që kanë respekt për natyrën dhe mjedisin. Nëse ne mendojmë se do t’i rrisim më tej pagat, pensionet dhe zinxhirin e vlerës në territoret tona pa rritur cilësinë e turizmit, ne mendojmë gabim. Nëse ne përqendrohemi dhe vazhdojmë vetëm me investime të vogla dhe me hotele që sjellin vetëm turizëm masiv, i cili nuk është i qëndrueshëm në afatgjatë, ne mendojmë gabim.
Kush mendon se turizmi i konsumatorëve që vijnë dhe paguajnë dhoma shumë të shtrenjta është vetëm turizëm i atyre që vijnë për pushime, mendon gabim. Investime si ky i Zvërnecit janë investime që do t’i donte çdo vend. Janë investime që jo çdo vend ka dëshirë t’i shohë të realizohen në Shqipëri. Janë investime që mobilizojnë bujqit, blegtorët dhe shoqëritë e transportit.
Sot, transformimi i gjithë vijës bregdetare të Vlorës e ka rritur katërfish vlerën e pronës në Vlorë, dhe ato janë prona të shqiptarëve. Çfarë do të thotë kjo që Shqipërinë nuk ua japim të huajve? Fadili e ka dëgjuar te ajo partia tjetër, por rezultoi gabim. Çfarë do të thotë që Shqipëria është e shqiptarëve? Kush e ka vënë në diskutim këtë? Puna është se si do t’i bëjmë shqiptarët të ndihen mirë në Shqipëri. Puna është t’i bëjmë të ndihen të barabartë si gjithë të tjerët”, tha Rama.
