Dy legjendat e futbollit brazilian, Ronaldo Nazário dhe Roberto Carlos, kanë nisur një projekt ambicioz për të rikthyer Inter de Limeira në majat e futbollit brazilian. Të dy ish-kampionët e botës janë pjesë e një grupi investitorësh që ka marrë kontrollin e 80% të aksioneve të klubit, ndërsa 20% do të mbeten në pronësi të shoqatës së klubit.
Marrëveshja u miratua nga drejtuesit e Inter de Limeira. Në votimin e zhvilluar më 31 gusht, 53 këshilltarë votuan pro dhe vetëm një kundër, duke i hapur rrugën një kapitulli të ri në historinë e klubit.
Grupi i investitorëve drejtohet nga Enrico Ambrogini dhe përfshin Ronaldo Fenomenin, Roberto Carlos, Princin Saudit Abdullah bin Saad bin Abdulaziz Al Saud dhe investitorë të tjerë.
Objektivat janë të mëdha. Projekti synon të modernizojë strukturën e klubit, të forcojë akademinë e të rinjve, të përmirësojë qendrën stërvitore dhe të profesionalizojë menaxhimin. Synimi kryesor është rikthimi i Inter de Limeira në elitën e futbollit brazilian, me objektiv “Serinë A” brenda tetë sezoneve.
Inter de Limeira, klub me më shumë se një shekull histori, ka fituar kampionatin Paulista në vitin 1986 dhe “Serinë B” braziliane në vitin 1988. Aktualisht skuadra garon në “Serinë C”, por tashmë është në një fazë vendimtare të sezonit, duke kërkuar ngjitjen në kategorinë e dytë.
