Ka dalë dhe fëmijë i dhjete nga shpella e përmbytur në Tajlandë, ndërsa mbeten ende të bllokuar në brendësi të tokës edhe dy të mitur të tjerë, si dhe trajneri i skuadrës.
Ekipet e shpëtimit rinisën sot fazën e tretë dhe të fundit të operacionit që pritet të finalizohet brenda ditës me evakuimin e të gjithë personave të mbetur në shpellë.
Përveç fëmijëve dhe trajnerit, do të dalin jashtë edhe katër ekspertët të cilët kanë qëndruar pranë tyre për një javë.
20 zhytës kanë hyrë në shpellë dhe po bëjnë përgatitjet për evakuimin e radhës.
Tetë nga 12 djemtë e bllokuar në shpellën e përmbytur u nxorën gjatë dy ditëve të para të operacionit të shpëtimit dhe tani ndodhen në spital. Sipas mjekëve, ata janë në gjendje të mirë mendore dhe fizike, ndërsa po i bëhen të gjitha ekzaminimet e nevojshme.
Fëmijët do të qëndrojnë në spital për të paktën shtatë ditë pasi disa kishin temperaturë të ulët dhe disa të tjerë probleme me mushkëritë. Fëmijët e shpëtuar deri më tani nuk mund të takojnë prindërit e tyre, por mund t’i shikojnë vetëm nëpërmjet xhamit.
Të vegjlit duhet të mbajnë syze dielli, pasi janë nxjerrë nga një vend i errët ku kanë qëndruar për më shumë se dy javë.
