Një fëmijë 1-vjeçar është dërguar pranë nënës së tij në Institucionin e Ekzekutimit të Vendimeve Penale në Pojskë, ku 34-vjeçarja po vuan një dënim prej dy muajsh burg për veprën penale “Dhunë në familje” ndaj vjehrrit të saj.
Për nënën dhe fëmijën është krijuar një ambient i përshtatur brenda institucionit të vuajtjes së dënimit, ku ata do të qëndrojnë në një dhomë të veçantë me kushte të përshtatshme për kujdesin ndaj një foshnjeje. Hapësira është pajisur me krevat për nënën, krevat për bebin dhe është përshtatur me elementë dekorativë për fëmijë, me qëllim krijimin e një mjedisi sa më të përshtatshëm për të voglin.
34-vjeçarja u arrestua një ditë më parë në Pikën e Kalimit Kufitar të Murrqanit, teksa po kthehej nga Gjermania, në zbatim të një vendimi gjyqësor të formës së prerë, të dhënë në mungesë në vitin 2023.
Sipas familjarëve, gruaja është nënë e tre fëmijëve të mitur. Njëri prej tyre është 4 vjeç dhe ka probleme shëndetësore, i dyti është 2 vjeç, ndërsa më i vogli, vetëm 1 vjeç, është dërguar pranë nënës së tij në burgun e Pojskës.
Familjarët kanë deklaruar se vjehrri e ka falur 34-vjeçaren dhe se dënimi prej dy muajsh burg duhej të përfshihej në përfitimet e ligjit të amnistisë. Megjithatë, institucionet kanë zbatuar urdhrin për ekzekutimin e vendimit gjyqësor.
Aktualisht, 34-vjeçarja po vuan dënimin në burgun e Pojskës, ndërsa fëmija 1-vjeçar do të qëndrojë me të në institucion, sipas parashikimeve për raste të tilla.
/vizionplus.tv
