Protestat qytetare për çështjen e Zvërnecit kanë frikësuar Kryetarin e Partisë Demokratike, sipas tij, Kryeministrin Edi Rama.
Në mbledhjen e grupit parlamentar, kryedemokrati pretendoi se kreu i qeverisë po përdor institucionet në varësi të tij për të ndaluar tubimet.
“Edi Rama, përveç angazhimit total të policisë kriminale, që është më kriminale se çdo bandë tjetër, të shërbimit informativ kombëtar, që bashkërendon të gjitha praktikat me Beogradin, ka mobilizuar mijëra rrogëtarë, punonjës të administratës shtetërore në krijimin e llogarive false në mediat sociale, në rrjetet sociale për të demonizuar protestën dhe protestuesit, për t’ia ulur shikueshmërinë e tyre dhe për të ndikuar në algoritmin, që sipas tij ia kontrollonte Irani algoritmin”, tha Berisha.
Thirrjet e protestuesve kundër tij dhe Partisë Demokratike, Berisha i cilësoi si manovra të socialistëve për të dalë kundër opozitës.
“Berisha në burg, PD e shitur… zero, asnjë pengesë. Ata që e thonë këtë janë për të mbaruar punën e Edi Ramës. I përshëndes demokratët që marrin pjesë në protestë, sepse po vendosin fundin e një diktatori më të keq pas Enver Hoxhës. Nuk duhet kurrsesi të harrojmë se çfarë kauze ka kjo protestë.”
Akuza hodhi edhe mbi punimet e reformës territoriale, që sipas Berishës janë një manovër e qeverisë që synon shpopullimin e vendit.
“Rama duro, e stopoi reformën territoriale… ka emëruar për reformë dy persona që janë me dosje. Atë që i ka bërë ai Thethit nuk ia ka bërë asnjë pushtues.”
Më pas, mbledhja e grupit të PD-së vijoi me dyer të mbyllura për të diskutuar aksionin opozitar në parlament.
/vizionplus.tv
