Protesta qytetare kundër qeverisë vijon edhe sot, duke hyrë në ditën e saj të 54-t. Qytetarët janë mbledhur në orën 08:30 para godinës së Kuvendit të Shqipërisë, në të njëjtën ditë kur zhvillohet seanca e fundit plenare e këtij sesioni parlamentar.
Protestuesit ritheksojnë se kërkesa e tyre kryesore dhe e panegociueshme mbetet dorëheqja e kryeministrit Edi Rama. Sipas aktivistëve, prania e tyre përpara Kuvendit synon t’u dërgojë deputetëve mesazhin se një pjesë e qytetarëve nuk ndihen të përfaqësuar nga Parlamenti aktual dhe kërkojnë reagim ndaj shqetësimeve të ngritura prej tyre.
Nga ana tjetër, Kuvendi pritet të mblidhet në orën 10:00.
Gjatë seancës pritet të raportojnë shtatë institucione kushtetuese: Këshilli i Lartë Gjyqësor (KLGJ), Këshilli i Lartë i Prokurorisë (KLP), Kontrolli i Lartë i Shtetit (KLSH), Prokuroria e Përgjithshme, SPAK, Avokati i Popullit dhe Inspektori i Lartë i Drejtësisë (ILD). Këto raportime ishin shtyrë nga seanca e kaluar për shkak të tensioneve të krijuara nga deputetët e Partisë Demokratike.
Në rendin e ditës janë parashikuar gjithashtu interpelanca dhe seanca pyetje-përgjigje me ministrin e Infrastrukturës dhe Energjisë, Enea Karakaçi.
Ndërkohë, raporti për Reformën Territoriale, prezantimi i të cilit u kërkua në seancën e kaluar nga Partia Socialiste, nuk është përfshirë në rendin e ditës. Megjithatë, Konferenca e Kryetarëve, e cila mblidhet një orë përpara nisjes së seancës, pritet të vendosë nëse do të ketë ndryshime në axhendën parlamentare ose shtyrje të sesionit.
