Skocia gjendet shumë pranë një referendumi të dytë për pavarësinë duke sinjalizuar goditje të fuqishme për pozitën e Mbretërisë së Bashkuar në arenën ndërkombëtare.
Udhëheqësja e Partisë Kombëtare Skoceze, Nikëlla Stërxhën, pasi fitoi me një shumicë dërrmuese zgjedhjet parlamentare në fundjavë, nuk humbi kohë për të sfiduar Londrën.
NICOLA STURGEON
PARTIA KOMBETARE SKOCEZE, KRYETARE
“Për çdo politikan në Westminster që përpiqet ta pengojë referendumin, unë do t’u thoja se po zgjidhni luftën jo vetëm me partinë kombëtare skoceze, por me dëshirat demokratike të popullit skocez. Njerëzit e vetëm që mund të vendosin për të ardhmen e Skocisë, janë skocezët, dhe asnjë politikan i Westminster-it nuk mund ose duhet të qëndrojë në rrugën e kësaj të drejte”.
Mbështetja e të gjelbërve skocezë, siguron kontrollin e 72 vendeve në parlamentin me 129 anëtarë, mjaftueshëm për të miratuar legjislacionin që autorizon një referendum të pavarësisë.
Parlamenti skocez mbikëqyr shërbimet publike, arsimin dhe policinë në veri të kufirit anglez, por nuk ka kompetenca për çështjet e mbrojtjes dhe të jashtme. Një betejë mes Edinburgut dhe Londrës, mund të paralajmërojë shpërbërjen e Mbretërisë së Bashkuar, e cila do të kishte pasoja të mëdha ndërkombëtare për Britaninë.
Kryeministri Boris Johnson ka bërë thirrje për një samit të drejtuesve nga Skocia, Uellsi dhe Irlanda e Veriut, duke thënë se Mbretëria është në pozitë më të mirë nëse qëndron e bashkuar
