Për të disatën herë, banorët e fshatit Zvezdë në bashkinë e Maliqit kanë dalë në protestë, duke denoncuar mungesën e ujit të pijshëm.
Sipas tyre, megjithëse është realizuar një investim prej mbi 600 mijë eurosh për ujësjellësin e ri të fshatit, në çezmat e banesave nuk ka ende ujë.
Banorët kërkojnë që dikush të mbajë përgjegjësi, ndërsa theksojnë se gjatë gjithë viteve të demokracisë nuk kanë pasur asnjëherë ujë të pijshëm në shtëpitë e tyre, duke u furnizuar vetëm nga burimet e fshatit.
“Gjithë fshati Zvezdë ka dalë për një mashtrim me ujin e pijshëm. U vodhën 600 milionë lekë, ky është uji. Vjen kryetari vetëm për dy foto. Ujësjellësi ishte me afat 7 muaj, u bë një vit e ca. Para një muaji u përfundua. Nuk ka ujë. Këtu nis gjëja nga mbrapa.”
“Tani kalojnë ato të bagëtive. Pihet ai ujë? Atë ujë do na japin akoma? Ujërat e zeza me lekët tona. Ku ka ujë të pijshëm? Këta duan të mashtrojnë. Gjithë fshati pa ujë, aty duhet investim, jo tallje.”
“Kemi një çezmë të rrjedhshme. Po të vish në orën 3 të mëngjesit, marrin gratë karrocat me bidona dhe, po t’i shohësh, edhe rrihen. Dalim edhe ne burrat, ç’të bëjmë? Jemi zënë e rrahur, nuk kemi muhabet me njëri-tjetrin. Përse? Për ujë. Ka 35 vjet paguajmë taksa. Ku vajtën taksat tona?”
“Ne e dimë si ia bëjmë. Me investimet tona, me burimet e fshatit. Në çdo vend të shposh në Zvezdë ka ujë, por nuk duan të investojnë. Groposen lekët në dhe. U tallën me lekët tona. Tani thonë se nuk paska ujë.”
Në fshatin Zvezdë jetojnë mbi 1,500 banorë, të cilët prej vitesh vuajnë mungesën e ujit të pijshëm.
Ndërkohë, drejtues të Ujësjellës Kanalizimeve Korçë kanë deklaruar se projekti është ende në zhvillim dhe nuk ka përfunduar plotësisht.
Sipas tyre, me përfundimin e punimeve, fshati do të furnizohet me ujë të pijshëm.
