Kristian Prenga nuk arriti të realizojë surprizën e madhe ndaj ish-kampionit të botës në peshat e rënda, Anthony Joshua, duke u mposhtur me nokaut në raundin e dytë në duelin e zhvilluar në Xhedah të Arabisë Saudite. Megjithatë, boksieri shqiptar la gjurmë në fillimin e përballjes, duke befasuar britanikun në raundin e parë.
Prenga, 35 vjeç, e nisi me shumë agresivitet sfidën dhe arriti ta vendoste në vështirësi Joshua-n, duke e rrëzuar dy herë në tapet në raundin e parë. Edhe pse goditjet nuk ishin tërësisht të pastra, paraqitja e shqiptarit solli entuziazëm të madh te tifozët. Por pas këshillave të ekipit të tij, Joshua u rikthye ndryshe në raundin e dytë.
Në raundin e dytë, ish-kampioni britanik rriti ndjeshëm ritmin dhe me disa goditje të forta e të sakta e detyroi Prengën të mbrohej në cep të ringut. Pas një serie goditjesh, gjyqtari ndërpreu sfidën, duke i dhënë fitoren me nokaut Joshua-s.
Pas përfundimit të duelit, Prenga reagoi me emocione të forta dhe falënderoi të gjithë ata që e mbështetën. Shqiptari pranoi humbjen me sportivitet, por premtoi rikthim më të fortë në të ardhmen.
“Urime për të. Kjo nuk ishte mbrëmja ime. Ishte plani i Zotit që ai të fitonte. Unë jam me Të. Çfarë Ai thotë, unë jam mirë. Mendova se mund ta bëja të njëjtën gjë edhe në raundin tjetër gjithashtu, por kjo nuk ndodhi.
Kisha vetëm 10% të tifozëve këtu sepse nuk kanë ardhur prej luftës. Por nëse do të ndodhte në Europë, ju premtoj se do të ishte 90% më shumë.
Ajo çfarë mund të them, ndjesë të gjithëve. Nuk ju bëra krenarë, por herën tjetër”, deklaroi Kristian Prenga.
“I’m Sorry…” 🇦🇱🥊 Kristian Prenga breaks his silence after dropping Anthony Joshua before being stopped by knockout. pic.twitter.com/2K2L01rkkA
— Kruja Chronicles (@FilteredZero) July 26, 2026
Për boksierin shqiptar, kjo ishte një nga sfidat më të rëndësishme të karrierës së tij, pasi një fitore ndaj Joshua-s do t’i hapte rrugën drejt elitës së boksit botëror. Në fund të përballjes, Prenga u pa i përlotur, ndërsa kërkoi falje për tifozët shqiptarë që kishin udhëtuar drejt Arabisë Saudite për ta mbështetur nga afër.
/vizionplus.tv
