Shpresë për grurin ukrainas/ Palët arrijnë marrëveshje në Stamboll për eksportet

Situata e grurit ukrainas duket se po merr zgjidhje: delegacionet ruse, ukrainase , turke dhe OKB që u takuan dje në Stamboll, arritën një marrëveshje për zhbllokimin e eksporteve.

 

Ministri turk i Mbrojtjes Hulusi Akar pjesë e delegacionit lajmëroi ngritjen e një qendre koordinimi në Stamboll për të monitoruar eksportin.

 

HULUSI AKAR
MINISTRI TURK I MBROJTJES

Është arritur një marrëveshje për çështje teknike si kontrollet e përbashkëta në pikat e destinacionit dhe siguria e lundrimit në rrugët e transferimit. Delegacionet ruse dhe ukrainase do të takohen sërish në Turqi javën e ardhshme ku do të shqyrtojnë edhe një herë të gjitha detajet.

 

Të njëjtin pohim bëri edhe sekretari i përgjithshëm i OKB-së, Antonio Guterres i cili theksoi se u shënua një hap i rëndësishëm në rrugën drejt një marrëveshjeje gjithëpërfshirëse.

 

ANTONIO GUTERRES
SEKRETARI I PËRGJITHSHEM I OKB

Kemi bërë një hap kritik përpara. Përparimi ishte jashtëzakonisht inkurajues. Tani, delegacionet po kthehen në kryeqytetet e tyre dhe shpresojmë se hapat e ardhshëm do të na lejojnë të arrijmë një marrëveshje përfundimtare.

 

Sipas tij marrëveshja u arrit në bazë të një plani të OKB për të transportuar miliona tonë drithë të bllokuar në Ukrainë për shkak të luftës.

Rreth 22 milionë tonë drithëra që duhen eksportuar e nëse kjo nuk ndodh, Organizata botërore për Ushqimin ka lajmëruar një përkeqësim të urisë për 180 milionë njerëz.