Të paktën tetë persona, gjashtë anëtarë të një familjeje që jetonte pranë qytetit Kryvyi Rih, një person në Kiev dhe një tjetër në Poltava, humbën jetën gjatë bombardimeve ruse në Ukrainë natën mes të mërkurës dhe të enjtes. Sulmet ndodhën vetëm disa orë pasi presidenti ukrainas Volodymyr Zelenskyy paralajmëroi për një “sulm masiv”.
Sipas kreut të administratës ushtarake të Kryvyi Rih, Oleksandr Vilkul, një raketë Iskander-M, e lëshuar nga rajoni rus i Voronezhit, goditi drejtpërdrejt një shtëpi në një fshat të zonës. Si pasojë u vranë gjashtë persona: dy vajza të moshës 5 dhe 12 vjeç dhe katër të rritur.
Vilkul njoftoi gjithashtu se tetë persona të tjerë u plagosën, mes tyre dy djem të moshës 6 dhe 15 vjeç. Këshilli bashkiak i Novopilias i shprehu ngushëllimet familjes Voronov, e cila humbi anëtarët e saj në sulm.
Në Kiev, autoritetet konfirmuan vdekjen e një personi nga bombardimet ruse, ndërsa dy persona të tjerë mbetën të plagosur. Në zonën e Brovary, pranë kryeqytetit, u plagosën pesë persona, përfshirë një fëmijë dhe dy gra.
Ndërkohë, në Poltava, një sulm me dron ndaj zyrave të një kompanie private shkaktoi vdekjen e një personi. Në qytetin perëndimor të Lvivit, të paktën pesë persona u plagosën, ndërsa kryetari i bashkisë deklaroi se disa njerëz mbetën të bllokuar nën rrënojat e një ndërtese.
/vizionplus.tv
