Struktura e Posaçme kundër Korrupsionit dhe Krimit të Organizuar (SPAK) ka publikuar bilancin e veprimtarisë për periudhën 1 janar–15 korrik 2026.
Sipas raportit, gjatë kësaj periudhe janë përfunduar 183 procedime penale, ose 64.9% më shumë krahasuar me të njëjtën periudhë të vitit 2025. Në të njëjtën kohë, numri i procedimeve aktive është ulur nga 616 në 551, ndërsa raporti mes çështjeve të reja dhe atyre të përfunduara ka arritur në 166.4%, duke reflektuar edhe trajtimin e dosjeve të mbartura nga vitet e mëparshme.
Një nga treguesit kryesorë të raportit lidhet me hetimet financiare. Me kërkesë të SPAK-ut, gjykata ka vendosur masa sekuestroje preventive mbi pasuri me vlerë rreth 440 milionë euro, në kuadër të pesë procedimeve penale. Pasuritë e sekuestruara përfshijnë mbi 150 mijë metra katrorë toka, troje dhe pyje, më shumë se 60 vila, apartamente dhe struktura hoteliere, mbi 10 shoqëri tregtare, më shumë se 620 llogari bankare, si dhe rreth 100 automjete e mjete lundruese. SPAK sqaron se kjo vlerë është paraprake dhe se masa e sekuestros nuk përbën konfiskim përfundimtar.
Drejtuesi i SPAK-ut, Klodjan Braho, deklaroi se institucioni ka shënuar progres të konsiderueshëm në luftën kundër korrupsionit dhe krimit të organizuar gjatë gjysmës së parë të vitit, duke theksuar se hetimet mbështeten në prova dhe fakte, ndërsa çështjet komplekse kërkojnë kohën e nevojshme për t’u përfunduar.
Raporti evidenton edhe përshpejtimin e trajtimit të procedimeve të regjistruara në vitet 2019–2021. Nga 108 procedime të mbartura që ishin aktive në fillim të vitit, deri më 15 korrik janë përfunduar 63, me një normë zgjidhshmërie prej 58.3%, krahasuar me vetëm 8.3% në të njëjtën periudhë të vitit të kaluar.
Gjatë periudhës raportuese, SPAK ka dërguar për gjykim 34 çështje të reja me 228 persona të pandehur, ndërsa ka hetuar 13 procedime që përfshijnë 16 zyrtarë ose ish-zyrtarë të nivelit të lartë, mes tyre kryetarë bashkish, ministra, deputetë, drejtues institucionesh, gjyqtarë dhe prokurorë.
Në të njëjtën kohë, kanë marrë formë të prerë vendimet e dënimit për 74 persona, nga të cilët 48 janë dënuar me burg. Mes të dënuarve janë edhe shtatë ish-zyrtarë të nivelit të lartë, përfshirë ish-ministra, ish-deputetë, ish-kryetarë bashkish dhe ish-prokurorë.
Raporti tregon gjithashtu se gjatë gjysmës së parë të vitit janë regjistruar 110 procedime të reja penale, mbi gjysma e të cilave janë nisur kryesisht nga vetë SPAK si rezultat i hetimeve proaktive.
Në aspektin ndërkombëtar, SPAK ka dërguar 107 kërkesa për ndihmë juridike jashtë vendit, ka trajtuar 40 kërkesa të ardhura nga autoritetet e huaja, ka krijuar gjashtë skuadra të reja të përbashkëta hetimore dhe ka aktualisht 33 skuadra aktive. Gjithashtu, gjatë kësaj periudhe janë shpallur në kërkim ndërkombëtar 36 persona.
