Presidentet Donald Trump dhe Vladimir Putin zhvilluan sot takimin e shumëpritur në Helsinki. Dy liderët diskutuan kokë më kokë për marrëdhëniet dypalëshe dhe çështjet më të rëndësishme ndërkombëtare.
Ndërsa gjatë konferencës së përbashkët për shtyp, ata kanë shtrënguar duart.
“Ne patëm kontakte gjatë muajve të mëparshëm, biseduam në telefon dhe u takuam për të diskutuar ngjarjet e ndryshme ndërkombëtare. Ka ardhur koha për një diskutim gjithëpërfshirës të marrëdhënieve tona bilaterale dhe disa pika të tjera.”
Presidenti amerikan përgëzoi homologun e tij për organizimin e kampionatit botëror në Rusi dhe shtoi se bota dëshiron t’i shohë së bashku Amerikën dhe Rusinë.
“Ne kemi diskutime për çdo gjë, nga tregtia deri tek ushtria, nga raketat deri te Kina. Ne do të flasim pak për Kinën dhe mikun tonë të përbashkët Presidentin kinez. Unë mendoj se bota dëshiron të na shohë së bashku. Ne jemi dy fuqitë e mëdha bërthamore, kemi 90 për qind të nukleares, dhe kjo nuk është një gjë e mirë, kjo është një gjë e keqe. Unë mendoj se ne mund të bëjmë diçka së bashku për këtë.”
Pak orë para takimit të planifikuar në drekë, Trump shkroi në twetter se “marrëdhëniet me Rusinë nuk kanë qenë kurrë më të këqija falë budallallëkut të Shteteve të Bashkuara”.
Ky ishte takimi i parë i posaçëm mes dy presidentëve. Më parë ata kanë biseduar vetëm në takime shumëpalëshe.
Trump dhe Putin zgjodhën jo rastësisht Helsinkin për takimin mes tyre. Ky vend është një pikëtakim tradite në marrëdhëniet SHBA – Rusi. Aty janë takuar më pare dhe ish-presidenti amerikan Gerald Ford dhe lideri i Ish-Bashkimit Sovjetik Leonid Brezhnev në vitin 1975.
Finlanda nuk është vend anëtar në NATO dhe ky fakt ka shërbyer si një mundësi më shumë për t’u takuar në një tokë asnjanëse.
