Sekretari amerikan i Shtetit, Marco Rubio, ka bërë të ditur se bisedimet mes Shteteve të Bashkuara dhe Iranit për rikthimin e lundrimit në Ngushticën e Hormuzit kanë shënuar përparim të rëndësishëm, por një marrëveshje përfundimtare ende nuk është arritur.
Duke folur për mediat në Departamentin Amerikan të Shtetit, Rubio tha se negociatat kanë avancuar dhe shprehu shpresën se një marrëveshje mund të finalizohet së shpejti.
“Ka pasur progres në bisedime, por ende nuk kemi arritur një marrëveshje. Shpresojmë që kjo të ndodhë shumë shpejt”, deklaroi Rubio.
Bisedimet kanë në fokus rritjen e numrit të anijeve tregtare që mund të kalojnë përmes Ngushticës së Hormuzit, një prej korridoreve më të rëndësishme detare për transportin global të naftës dhe gazit.
Edhe Sekretari amerikan i Thesarit, Scott Bessent, është shprehur optimist se Uashingtoni dhe Teherani janë shumë pranë një marrëveshjeje për rihapjen e Ngushticës së Hormuzit, duke vlerësuar se ajo mund të arrihet “sot ose nesër”.
Në një intervistë për CNBC, Bessent tha se negociatat me Iranin po vazhdojnë dhe se një marrëveshje do të garantonte lirinë e lundrimit, duke ndihmuar gjithashtu në uljen e çmimeve ndërkombëtare të energjisë.
“Jemi në bisedime me iranianët dhe besoj se ekziston mundësia që të kemi një marrëveshje sot ose nesër, në mënyrë që Ngushtica të hapet dhe të lëvizim drejt një situate më të normalizuar në këtë konflikt”, u shpreh ai.
I pyetur nëse Irani do të ketë mundësi të vendosë tarifa për kalimin e anijeve, Bessent nuk dha detaje mbi përmbajtjen e marrëveshjes, por theksoi se pika kryesore do të jetë garantimi i lirisë së lundrimit në Ngushticën e Hormuzit.
“Do të ketë liri të lundrimit”, tha ai, duke shtuar se, megjithëse situata mbetet e paqëndrueshme, tashmë po vërehet rritje e lëvizjes së anijeve që po largohen nga zona.
Bessent u shpreh gjithashtu optimist për ndikimin që një marrëveshje do të ketë në tregjet globale të energjisë. Sipas tij, qindra anije janë në pritje për të kaluar përmes Ngushticës së Hormuzit, çka ka ndikuar në tregtinë ndërkombëtare.
“Pres që çmimet e energjisë të rikthehen në nivele më të ulëta, gjë që do të jetë pozitive për të gjithë botën”, deklaroi Sekretari amerikan i Thesarit.
