Autoritetet meksikane kanë arrestuar Ramón Ángel Álvarez Ayala, i njohur me nofkën “El R1”, një nga drejtuesit kryesorë të Kartelit Jalisco New Generation (CJNG), i dyshuar si organizator i disa akteve të rënda kriminale, përfshirë dy vrasje që tronditën opinionin publik në Meksikë.
Operacioni u zhvillua nga forcat speciale në shtetin Jalisco, pas disa muajsh hetimesh dhe punës së inteligjencës. Gjatë aksionit u vra një anëtar i ekipit të sigurisë së të dyshuarit, ndërsa autoritetet bënë të ditur se arrestimi u realizua pas një ndjekjeje me automjete në qytetin Atotonilco el Alto.
Sekretari federal i Sigurisë, Omar García Harfuch, e cilësoi arrestimin si një goditje të rëndësishme ndaj një prej organizatave kriminale më të fuqishme dhe më të dhunshme në vend. Sipas tij, “El R1”, i cili ishte liruar nga burgu në vitin 2022, dyshohet se ka organizuar një sërë sulmesh të përgjakshme në rajon.
Një nga çështjet më të bujshme lidhet me vrasjen e influencueses 23-vjeçare Valeria Márquez, e cila u ekzekutua në maj të vitit të kaluar ndërsa transmetonte drejtpërdrejt në TikTok nga salloni i saj i bukurisë në Zapopan. Sipas hetimeve, autori, i maskuar si korrier, hyri në sallon, i kërkoi të konfirmonte identitetin dhe më pas e qëlloi dy herë me armë zjarri. Pamjet e krimit u përhapën me shpejtësi në rrjetet sociale.
Prokuroria pretendon se Márquez kishte pasur një lidhje romantike me Francisco Álvarez, një nga djemtë e “El R1”. Sipas autoriteteve, ai e kishte kërcënuar disa herë të renë dhe më pas i kishte kërkuar të atit të organizonte eliminimin e saj. Djali i tij dhe autori i dyshuar i vrasjes vijojnë të jenë në arrati.
Hetuesit e lidhin “El R1” edhe me vrasjen e kryebashkiakut të qytetit Uruapan, Carlos Manzo, i cili u qëllua për vdekje në nëntor gjatë festimeve të Ditës së të Vdekurve. Sipas autoriteteve, një adoleshent iu afrua nga pas dhe e qëlloi disa herë, ndërsa më pas u vra nga truprojat e kryebashkiakut. Manzo ndërroi jetë në spital si pasojë e plagëve.
Karteli Jalisco Neë Generation konsiderohet një nga organizatat kriminale më të rrezikshme në Meksikë. Ai akuzohet për trafikim të fentanilit, metamfetaminës dhe kokainës, si edhe për zhvatje të bizneseve lokale. Administrata amerikane e ka shpallur organizatën si organizatë të huaj terroriste.
Autoritetet meksikane nuk kanë konfirmuar nëse Shtetet e Bashkuara kanë marrë pjesë drejtpërdrejt në operacion. Megjithatë, ambasadori amerikan në Meksikë, Ronald Johnson, përshëndeti arrestimin, duke deklaruar se “ata që gjenerojnë dhunë dhe trafikojnë fentanil do të mbajnë përgjegjësi për veprimet e tyre”.
