Policia e Fierit ka ndërhyrë për t’u ardhur në ndihmë banorëve të fshatit Riban në Mallakastër, ku një zjarr i përmasave të mëdha ka përfshirë sipërfaqe të konsiderueshme toke dhe ka rrezikuar zonat e banuara.
Për shkak të përhapjes së shpejtë të flakëve, shërbimet e Policisë kanë evakuuar 15 familje, si dhe bagëtitë dhe kafshët shtëpiake të banorëve, me qëllim garantimin e sigurisë së jetës dhe pronës së tyre.
Në operacion janë angazhuar efektivë të Komisariatit të Policisë Mallakastër, strukturat e Drejtorisë Vendore të Policisë Fier, shërbimet zjarrfikëse, Forcat Kombëtare të Sigurisë dhe strukturat e emergjencave civile.
Ndërhyrja është mbështetur edhe nga ajri me një helikopter të Ministrisë së Mbrojtjes dhe një avion Canadair, të cilët po ndihmojnë në izolimin dhe shuarjen e vatrave të zjarrit.
Flakët kanë shkaktuar dëme të konsiderueshme në bimësi, ndërsa forcat në terren vijojnë përpjekjet për vënien nën kontroll të situatës dhe mbrojtjen e banorëve të zonës.
Ndërkohë, grupi hetimor nën drejtimin e Prokurorisë po punon për përcaktimin e shkakut të zjarrit, dokumentimin e rrethanave dhe identifikimin e përgjegjësve, nëse rezulton se zjarri është shkaktuar nga veprime të paligjshme.
Policia u bën apel qytetarëve të shmangin ndezjen e zjarreve për djegien e mbetjeve bimore apo për qëllime të tjera, pasi përhapja e pakontrolluar e flakëve mund të sjellë pasoja të rënda për jetën, pronën dhe mjedisin.
Autoritetet ftojnë qytetarët të denoncojnë çdo rast zjarrvënieje apo paligjshmërie në numrin 112.
