Katari është shprehur optimist për progresin e përpjekjeve diplomatike në krizën e Lindjes së Mesme, duke vlerësuar se një marrëveshje mund të arrihet në orët ose ditët e ardhshme.
Gjatë konferencës javore për mediat, zëdhënësi i Ministrisë së Jashtme të Katarit, Majed Al Ansari, tha se Doha vijon t’u bëjë thirrje të gjitha palëve për uljen e tensioneve dhe dialog, ndërsa mbështet aktivisht përpjekjet ndërmjetësuese të Omanit.
Sipas tij, aktualisht nuk ka negociata të drejtpërdrejta mes palëve të përfshira në konflikt. Megjithatë, ndërmjetësuesit janë në komunikim të vazhdueshëm dhe po shkëmbejnë projekt-marrëveshje, një proces që vazhdon që nga nisja e konfliktit në shkurt.
Ngushtica e Hormuzit mbetet pikë kyçe
Al Ansari theksoi se, pavarësisht mungesës së kontakteve të drejtpërdrejta, procesi diplomatik mbetet aktiv dhe mund të sjellë rezultate në të ardhmen e afërt.
Ai përsëriti qëndrimin e Katarit se Ngushtica e Hormuzit duhet të rikthehet në funksionim të plotë, duke garantuar lirinë e lundrimit për të gjitha anijet.
Në kushte normale, përmes Ngushticës së Hormuzit kalon rreth 20% e furnizimit botëror me naftë dhe gaz natyror. Megjithatë, sipas Katarit, aktualisht vetëm pak anije në ditë arrijnë ta përshkojnë këtë rrugë detare, duke rritur shqetësimet për tregtinë ndërkombëtare dhe tregjet globale të energjisë.
Mosmarrëveshje për kalimin e anijeve
Zëdhënësi i Ministrisë së Jashtme të Katarit bëri të ditur se Irani ka propozuar vendosjen e një tarife për kalimin e anijeve në Ngushticën e Hormuzit, një ide që është refuzuar nga Shtetet e Bashkuara.
Në përfundim, Al Ansari deklaroi se çështja e Ngushticës së Hormuzit duhet të zgjidhet nga vetë vendet e rajonit, përmes dialogut dhe bashkëpunimit.
