Qeveria spanjolle ka vendosur të njohë një shtet palestinez deri në verë, sipas deklaratave të kryeministrit Pedro Sanchez në Aman, të cilat u botuan nga disa gazeta spanjolle.
“Duhet të mendojmë seriozisht për ta bërë këtë këtë verë”, u tha kryeministri spanjoll gazetarëve që e shoqëronin në turneun e tij në tre vende në Lindjen e Mesme që filloi në Jordani, sipas gazetës La Vanguardia.
Deklaratat e tij tregojnë një përshpejtim të kohës që Pedro Sanchez kishte paraqitur së fundmi për njohjen e një shteti palestinez. Më 9 mars, ai njoftoi se do t’i propozonte parlamentit spanjoll që ta votonte këtë njohje deri në fund të mandatit parlamentar, pra deri në verën e vitit 2027.
Më pak se dy javë më vonë, më 22 mars, në margjinat e samitit të BE-së, kryeministri spanjoll dhe homologët e tij të Irlandës, Maltës dhe Sllovenisë publikuan një deklaratë të përbashkët në të cilën ata deklarohen të gatshëm të njohin Palestinën.
Gazeta El País vlerëson se njohja mund të bëhet gjatë fushatës parazgjedhore të zgjedhjeve evropiane, të cilat në Spanjë mbahen më 9 qershor, ose në javët në vijim. /vizionplus.tv
