Ka mbërritur në spitalin e Traumës efektivi i plagosur gjatë një operacioni në Lozhan të Maliqit, Edison Adri. Drejtoresha e spitalit të Traumës bëri me dije se efekviti i “Shqiponjave” ka dëmtime në pjesën e qafës dhe kokës.
“Pacienti është pritur në spitalin e Korçës, është intubuar. U fut menjëherë në bllokun operator dhe po vlerësohet. Do themi më shumë për ecurinë në vijnm, po bëhet maksimumi. Ka lëndime në pjesën e qafës dhe kokës”, tha drejtoresha e spitalit të Traumës.
Sakaq, drejtori i Policisë së Shtetit Skënder Hita theksoi se sot me ngjarjen e rëndë të ndodhur në Lozhan të Korçës, humbi një shërbëtor të Policisë së Shtetit.
“Policia e Shtetit humbi shërbëtorin e saj. Edhe një punonjës policie është i plagosur rëndë dhe po merr ndihmë mjekësore. Edhe personi në kërkim gjatë shkëmbimit të zjarrit u plagos dhe është në spitalin e Korçës. Është vërtet një ngjarje ku nuk do doja të isha para jush”, tha ai.
Hita deklaroi se Prokuroria e rrethit të Korçës ka nisur hetimet, ndërsa shtoi se gjithashtu do të ketë një njoftim më të gjerë për të gjithë dinamikën e ngjarjes.
“Hetimet kanë nisur si nga prokuroria e rrethit Korçë. Unë pas këtij momenti do largohem drejt Korçës dhe do keni një njoftim për gjithë dinamikën”, tha ai.
Gjatë operacionit, u vra efektivi tjetër Enea Mekolli. Ndërsa autori i ngjarjes, Violand Braçellari mbeti i plagosur./vizionplus.tv
