Ish-deputeti i Partisë Demokratike, Endri Hasa deklaroi se shqiptarët janë të detyruar të paguajnë 44 milionë dollarë për autostradën Tiranë-Elbasan. Sipas Hasës, për punimet e kësaj rruge, tenderin e mori miku i socialistit Taulant Balla, Edmond Bego. Ai shtoi se abuzimi dhe korrupsioni do të detyrojnë shqiptarët të fusin duart në xhepa për llogari të tij.
“Punimet e Autostradës Tiranë Elbasan u vonuan 6 vite sepse lekët duhet ti merrte Edmond Bego për llogari të Taulant Ballës. Përveç kostove të rritura prej abuzimit dhe korrupsionit, për shkak të hajdutëve të rilindjes tashmë me vendim arbitrazhi do duhet ti paguhen dhe 44 milionë dollarë të tjera kompanisë që ndertoi rrugën”, tha ai në “Facebook”.
Demokrati theksoi se një shumë e tillë do të paguhet në një kohë kur një pjesë e qytetarëve të dëmtuar nga tërmeti janë ende në çadra e të tjerë humbin vendet e punës prej krizës ekonomike.
“Ndërkohë që qytetarët e dëmtuar nga tërmeti janë ende në çadra, ndërkohë që vendet e punës mbyllen, Edi Rama dhe hajdutët që e rrethojnë mendojnë vetëm si ta zhvasin dhe varfërojnë çdo ditë vëndin. 44 milionë dollarët duhet ti paguajë Edi Rama dhe banda e tij dhe jo shqiptarët.”
Endri Hasa kërkoi që qeveria e Edi Ramës të largohet sa më parë dhe të japë llogari për çdo qindrakë, që sipas tij, u ka vjedhur shqiptarëve.
