Pas dështimit të negociatave për formimin e një koalicioni për qeverinë e re italiane, presidenti Sergio Mattarella i ka besuar kryetarit të dhomës së deputetëve Roberto Fico, detyrën e negociatorit.
Përballë ngërçit politik në të cilin gjendet vendi, synohet tashme arritja e një marrëveshje të mundshme qeverisës mes Lëvizjes 5 Yje dhe Partisë Demokratike. Afati i fundit i negociatave me përfaqësuesit e këtyre dy forcave politike do të jetë dita e enjte.
Në raundin e parë të negociatave nuk u arrit dakordësi. Kushti i 5 Yjeve është një koalicion, por pa Berlusconin, gjë që kundërshtohet fort nga lideri i Lega Nord Matteo Salvini, i cili gjithashtu përjashton një koalicion me Partinë Demokratike.
Në rast se arrihet marrëveshja në raundin e dytë të negociatave, qeveria e re italiane do të jetë një qeveri e Lëvizjes 5 Yje me Partinë Demokratike.
Lëvizja 5 yje u konfirmua forca e parë fituese në zgjedhjet e 4 marsit, duke marrë rreth 32 % të votave të italianëve, koalicioni i djathtë është formacioni fitues me mbi 37 % të votave, ndërsa Partia Demokratike doli humbëse.
