Media opozitare iraniane Iran International ka publikuar detaje të reja mbi takimin e shumëpërfolur mes presidentit të Iranit, Masoud Pezeshkian, dhe udhëheqësit suprem Mojtaba Khamenei, duke shtuar misterin rreth figurës së këtij të fundit.
Sipas raportimit, Pezeshkian u dërgua në një vend sekret në Teheran, ku iu lejua të qëndronte vetëm pak minuta brenda një automjeti me xhama të zinj.
Aty, sipas burimeve të medias, ndodhej një person që iu prezantua si Mojtaba Khamenei, por presidenti nuk mundi ta shihte kurrë fytyrën e tij për shkak të errësirës në automjet.
Burimet pretendojnë se truprojat nuk lejuan as një shtrëngim duarsh dhe se Pezeshkian dëgjoi vetëm zërin e bashkëbiseduesit. Më vonë, ai dyshohet se ka pyetur bashkëpunëtorët e tij nëse personi me të cilin u takua ishte vërtet udhëheqësi suprem.
Ky version bie ndesh me deklaratat publike të vetë Pezeshkianit, i cili në muajin maj kishte thënë se kishte zhvilluar një takim prej rreth dy orë e gjysmë me Khamenein në një atmosferë miqësore. Sipas Iran International, takimi zgjati vetëm pak minuta.
Raporti pretendon se takimi u realizua vetëm pasi presidenti kishte kërkuar vazhdimisht një audiencë dhe kishte kërcënuar edhe me dorëheqje. Pas këtij episodi, ai thuhet se ka kërkuar një takim të dytë në rezidencën zyrtare të udhëheqësit suprem, por kërkesa i është refuzuar.
Artikulli thekson gjithashtu se, rreth pesë muaj pas zgjedhjes së Mojtaba Khameneit si pasues i të atit, ende nuk është publikuar asnjë video apo mesazh audio i tij, çka ka ushqyer spekulime mbi vendndodhjen dhe gjendjen e tij.
Ndërkohë, raporti përmend edhe deklarata kontradiktore të zyrtarëve iranianë mbi kontaktet me udhëheqësin suprem, si dhe pretendime se tensionet mes presidencës dhe zyrës së Khameneit janë shtuar.
Pretendimet e publikuara nga Iran International nuk janë konfirmuar në mënyrë të pavarur nga autoritetet iraniane.
