Sokol Hoxha, i dënuar nga drejtësia shqiptare për vrasje dhe i kërkuar prej më shumë se tre dekadash, është ekstraduar nga Shtetet e Bashkuara të Amerikës drejt Shqipërisë, ku ka mbërritur mëngjesin e kësaj të enjteje në Aeroportin Ndërkombëtar të Rinasit.
Hoxha do të vuajë dënimin me 25 vite burg të dhënë nga gjykatat shqiptare për vrasjen e dy vëllezërve në Patos. Paralelisht, ai kërkohet edhe nga autoritetet belge për të ekzekutuar dënimin me burgim të përjetshëm të dhënë për vrasjen e Brunilda Dervishit.
Ekstradimi është realizuar me një fluturim çarter, pas arrestimit të tij më 5 maj 2026 në shtetin e Ohajos, SHBA. Ai u lokalizua dhe u vu në pranga nga Ekipi për Kapjen e të Arratisurve i Shërbimit të Marshallëve të SHBA-së, në bashkëpunim me autoritetet e emigracionit dhe strukturat e INTERPOL-it, fillimisht për shkelje të ligjeve të emigracionit.
Sipas informacioneve të bëra publike, Hoxha kishte qëndruar në arrati për më shumë se 30 vite. Ai rezulton se kishte siguruar një pasaportë britanike me identitetin e rremë Hysen Gashi, dokument që i mundësoi më pas hyrjen në Shtetet e Bashkuara. Autoritetet britanike kanë revokuar këtë pasaportë dhe vijojnë hetimet për rrethanat e pajisjes së tij me identitetin e rremë.
Pas arrestimit në SHBA, autoritetet shqiptare kanë nisur komunikimin me homologët belgë për transferimin në Shqipëri edhe të vendimit penal të dhënë nga drejtësia belge, me qëllim koordinimin e procedurave për vuajtjen e dënimeve.
Me mbërritjen në Shqipëri, Sokol Hoxha do t’u nënshtrohet procedurave ligjore për ekzekutimin e vendimit të gjykatave shqiptare, ndërsa pritet të ndiqen edhe hapat ligjorë lidhur me kërkesën e autoriteteve belge.
/vizionplus.tv
