Zimbabvet kanë festuar gjithë natën pasi presidenti më i vjetër në botë, Robert Mugabe, i cili mbajti pushtetin në duart e tij për 37 vite me radhë, dha dorëheqjen.
Kryetari i parlamentit lexoi një letër ku shkruhej për dorëheqjen e Mugabe, për të lejuar një transferim të qetë dhe paqësor të pushtetit, por duke theksuar se vendimi i tij ishte vullnetar.
Ligjvënësit nga partia në pushtet dhe opozita brohoritën të lumtur pas letrës së dorëheqjes, ndërsa njerëzit festonin duke kënduar dhe vallëzuar në rrugët e kryeqytetit.
Atmosfera festive mbizotëroi në vend, ndërsa njerëzit shprehin gëzimin e tyre duke valëvitur flamujt, e duke thënë që më në fund, dita e shumëpritur erdhi.
Tashmë ish-zëvëndëspresidenti Emmerson Mnangagua, i cili ishte larguar nga vendi për shkak të dyshimeve për eliminimin e tij, pritet të kthehet nga Afrika fqinje dhe të emërohet si president i ri brenda 48 orësh, dhe do të qëndrojë në këtë post deri në zgjedhjet e ardhshme që do të mbahen në shtator të 2018-tës.
93-vjeçari Mugabe, i cili njihet si një tiran i pamëshirshëm i kohëve moderne, ishte shprehur më herët se vetëm Zoti mund ta hiqte nga presidenca. Ai ka dominuar skenën politike të Zimbabvesë që kur vendi shpalli pavarësinë nga Mbretëria e Bashkuar në vitin 1980.
Por, ajo që duket se do ta përjetojë më keq dorëheqjen e Mugabes, është bashkëshortja e tij Grace, pasi 52-vjeçarja kishte planifikuar të zëvendësonte bashkëshortin e saj.
