Mbrëmja e së martës mbylli dhe ndeshjet kualifikuese të Kupës së Botës ku u prenë biletat e fundit për në botërorin “Katar 2022”. Pas mungesës në Rusi 2018, Holanda rikthehet të marrë pjesë në Botëror.
Tulipanët mundën 2-0 Norvegjinë, ndonëse për kalimin më tej mjaftonte dhe 1 pikë. Dueli nuk ishte aq i lehtë për holandezët, megjithatë përtej vështirësive ata arritën të bënin detyrën dhe të merrnin kreun e grupit. Kombëtarja holandeze krijoi raste dhe prodhoi lojë të bukur edhe pse çdo gjë u vendos pak para fundit. Bergwejn në minutën e 86 dhe Depaj në shtesë mbyllën llogaritë e sfidës e siguruan një vend për më tej. Ndërsa Norvegjia mbylli rrugëtimin e saj duke u pozicionuar e treta me 18 pikë, pasi vendi i dytë do t’i përkasë Turqisë, që mundi Malin e Zi 2-1 dhe siguroi kështu një vend për në Play Off.
Edhe në grupin E, gjithçka ishte e vendosur Belgjika e kishte siguruar një shans për më tej, ndërsa mbrëmjen e të martës nuk shkoi më shumë se një barazim 1-1 përballë Uellsit. Një pikë që kënaq të dyja palët, pasi Belgjika mbetet e para, ndërsa uellsianët sigurojnë një vend në Play Off.
Në grupin D, Franca edhe pse kishte blinduar vendin e parë, bëri detyrën dhe mundi 2-0 Finlandën çfarë i kushtoi kësaj të fundit kualifikimin në Play Off, pasi në ndeshjen tjetër Ukraina mundi Bosnjë Hercegovinën dhe e mbylli me një pikë më shumë.
Në grupin e Amerikës së Jugut, Argjentina mori një biletë për në Katar pas barazimit pa gola në klasiken e futbollit përballë Brazilit. Një lojë e bukur dhe me shumë raste nga të dyja skuadrat, mirëpo rrjetat nuk u prekën asnjëherë. Kështu në 13 ndeshje të luajtura, Brazili mbetet ne vendin e parë me 35 pikë dhe Argjentina e dyta me 29 pikë.
