Qeveria vijon promovimin e nismës “Dyfisho biznesin tënd”, ku zëvendëskryeministrja Albana Koçiu, nga një kompani private ftoi bizneset të aplikojnë.
“Janë deri në 2 milionë euro për bizneset që duan të aplikojnë dhe qeveria mbulon 70% të kolateralit, ndërkohë që norma e interesit është 2-3%, një normë shumë e favorshme. Janë në total 250 milionë euro në dispozicion dhe, bazuar në kërkesat, mund ta çojmë këtë fond deri në 1 miliard euro”, tha Koçiu.
Përveç rritjes së kapaciteteve të bizneseve, pritshmëria është që kjo skemë të ndihmojë kompanitë shqiptare në rritjen e standardeve për t’u bërë pjesë e tregut europian.
“Sfida tjetër e jona është afrimi me standardet europiane dhe të qenurit pjesë e tregut europian. Bizneset tona duhet të jenë në linjë dhe të përshtaten me këto standarde. Nëse prodhoni produkte për eksport, ato duhet të kenë cilësinë që kërkon Bashkimi Europian”, tha Koçiu.
Kjo nismë është e hapur për bizneset që nga muaji maj i këtij viti dhe pritet të zgjasë deri në nëntor të vitit 2027.
