Seanca plenare është shoqëruar sërish me tensione, pasi deputetët e opozitës kanë vijuar të bllokojnë foltoren, duke penguar zhvillimin normal të punimeve dhe prezantimin e raporteve për Reformën Administrativo-Territoriale.
Nërkohë kryeministri Edi Rama i është bashkuar seancës plenare.
Pas disa ndërprerjeve dhe bllokimit të foltores nga deputetët demokratë, Kuvendi mbylli diskutimet dhe kaloi në procedurat e votimit. Me kërkesë të mazhorancës, kryetari i Kuvendit, Niko Peleshi, ndërpreu debatin dhe njoftoi një pushim 5-minutësh, për t’u rikthyer më pas me procesin e votimit.
Gjatë seancës, kreu i Grupit Parlamentar të Partisë Socialiste, Taulant Balla, akuzoi opozitën se po pengon qëllimisht punën e Kuvendit.
“Herën e shkuar skenari ishte të mos fliste Avokati i Popullit, sot është që të mos flasë zoti Mazniku. Mua më vjen keq që skenarin e bëni për të mos lënë raportin lidhur me veprimtarinë e organeve të drejtësisë. Megjithatë, ne do ta gjejmë mundësinë të komunikojmë. Është e pavërtetë që sot do të votohet Reforma Administrativo-Territoriale, sot paraqiten raportet. Mbase jeni prapë në bojkot, se ju e keni shkollë nate këtë, s’merret vesh kur vini e s’merret vesh kur ikni”, u shpreh Balla.
Në përfundim të fjalës së tij, kreu i grupit parlamentar socialist kërkoi mbylljen e diskutimeve dhe kalimin direkt në votimin e çështjeve të rendit të ditës.
/vizionplus.tv
