Kryetari i Partisë Demokratike, Lulzim Basha e nisi ditën duke komentuar një raport të “EuCham” për klimën ekonomike në Shqipëri dhe mundësitë për të bërë biznes.
Me anë të një postimi në “Twitter”, Basha tha se ky raport është tregues i qartë që kjo qeveri ka dështuar.
“Raporti i fundit i EuCham që e rendit 🇦🇱 ndër tre vendet e fundit në 🇪🇺 për të bërë biznes, konfirmon qartë se kjo qeveri ka dështuar: sot kriza është shtrirë në çdo hallkë të ekonomisë. Me Ramën, Shqipëria u bë ndër vendet më të korruptuara, me taksat më të larta në rajon,më pak tërheqëse për investime.”
Në vijim, lideri demokrat premtoi se PD do të japë më shumë mundësi për shqiptarët kur të ngjitet në pushtet.
“Vendit sot i duhet një model i ri ekonomik, me taksa të ulëta,mbështetje për sipërmarrjen, stimulim për investimet dhe bizneset që hapin vende pune. Me planin tonë ne do të kemi taksën e sheshtë 9%,do të luftojmë konkurencën e pandershme dhe korrupsionin, do ti japim frymëmarrje ekonomisë për të sjellë investime, mundësi punësimi me të ardhura dinjitoze dhe jetë më të mirë për të gjithë shqiptarët.”
