Tronditet Tirana nga një tjetër shpërthim tritoli. Rreth orës 19:30 ka shpërthyer automjeti tip ‘Benz’ në pronësi të prokurorit Arjan Muça.

 

Vizion Plus sjell pamjet ekskluzive të automjetit të shpërthyer, i cili ishte parkuar në parkingun në një qender tregtare tek zona e Komunës së Parisit.

 

 

Fatmirësisht nga shpërthimi nuk ka të lënduar. Shpërthimi ka ndodhur në pjesën e përparme të mjetit. Siç duket edhe nga pamjet, shënjestra ka qenë drejtuesi i tij.

 

Kreu i Policisë së Tiranës, Rebani Jaupi tha se ngjarja po hetohet nga strukturat policore, ndërkohë që pista e hetimit është fokusuar tek puna e prokurorit Arjan Muça dhe e bashkëshortes së tij Gentiana Muça, e cila është gjyqtare pranë Gjykatës Administrative të Apelit në Tiranë.

 

REBANI JAUPI

DREJTOR I POLICISE SE TIRANES

“Aktualisht po kryhen veprimet, mjeti ka dëmtime në pjesën  e përparme. Makina përdoret nga ky prokuror. Prej një periudhe 2 vjeçare çdo natë parkohet pranë kësaj qendre. Janë marrë masa nga policia për dokumentimin e kësaj vepre penale. S’ka dëmtime në njerëz dhe as të mjeteve të tjera. Është një shpërthim që ka ndodhur vetëm në pjesën e përparme të makinës. S’ka pasur asnjë person aty afër”.

 

Policia ka sekuestruar kamerat e sigurisë ku pritet që të ndihmojë hetimet për identifikimin e autorëve. Arjan Muça ka qenë më përpara oficer i Policisë Gjyqësore pranë Krimeve të Rënda, më pas ka punuar si prokuror në Gjirokastër, por prej pak kohësh është vendosur me statusin e Prokurorit pranë KLP-së. Ndërkaq, theksojnë se gjyqtarja Gentjana Muça është bashkëshortja e prokurorit Arjan Muça. Ajo ka qenë gjyqtare në Gjirokastër, ndërsa tani është te Gjykata Administrative e Apelit në Tiranë. Ndonëse makina është në pronësi të prokurorit Arjan Muça, ajo përdorej dhe nga bashkëshortja e tij. Kjo për policinë nuk përjashton dyshimet se në shënjestër mund të ketë qenë bashkëshortja e tij.

 

 

Leave a Reply

Your email address will not be published. Required fields are marked *