Lideri i opozitës Sali Berisha ndryshoi qëndrim në raport me vendimin e pritshëm të parlamentit për t’i hequr imunitetin. Edhe pse më parë kishte deklaruar se do ta zbatonte vendimin e kuvendit, sot ish-kryeministri Berisha gjatë një konference me gazetarët deklaroi se ky është një vendim i paligjshëm. Lideri i opozitës sqaroi se do të konsultohet me avokatët e tij nëse do të zbatojë vendimin e gjykatës që pason heqjen e imunitetit për arrest shtëpie apo arrest në burg.
“Natyrisht unë kam avoketërit, i dëgjoj sepse me votimin e parlamentit mbyllet një cikël i këtij procesi. Dhe unë në këshillim me avoketërit, do marr vendimet që duhet të marr. Dje pashë që ajo seancë ishte turpi më i madh në historinë e këtij parlamenti”, tha Berisha.
Lexo edhe :
Related Posts
Lideri i opozitës Berisha sqaroi se ndryshimi i qëndrimit erdhi pas mbledhjes së Këshillit të Mandateve dhe Imunitetit, kur sipas tij prokurorët nuk paraqitën asnjë provë.
“Unë e kam bërë të qartë se përsëri nuk e njoh vendimin. Sepse ky vendim është një akt i turpshëm, një akt i neveritshëm i komisionit Basha-Brava”, u shpreh ai.
Sipas Berishës paligjshmëria e veprimeve të prokurorisë qëndron në vendosjen e masës detyrim paraqitje pa marrë më parë autorizimin e parlamentit. Lideri i opozitës paraqiti edhe vendimin e gjykatës së krimeve të rënda në atë kohë, ku vlerësohet se për sa kohë që parlamenti i ka dhënë leje prokurorisë që Saimir Tahirit t’i ndalohet dalja jashtë vendit nuk ka pengesë për aplikimin e kësaj mase.
Por akuzat e Berishës kundër prokurorëve të SPAK-ut nuk u kufizuan vetëm tek çështja e tij. Lideri i opozitës njoftoi se do të padisë penalisht prokurorët Dritan Prençi e Arben Kraja, pasi sipas tij kanë amnistuar kreun e bashkisë së Tiranës, Erion Veliaj, në hetimin e inceneratorit të Tiranës.
“PD do ngrejë padi penale ndaj skapistëve Kraja, Prençi për këtë akt të pashembullt ndonjëherë në historinë e hetimit”, deklaroi Berisha.
Përveç padive penale, pak ditë më parë Berisha paralajmëroi edhe protesta para godinës së SPAK-ut. /vizionplus.tv
