Ministri për Evropën dhe Punët e Jashtme, Ferit Hoxha, zhvilloi ditën e sotme një takim me Komisioneren e BE, Marta Kos, gjatë vizitës së tij në Dublin.
Në postimin e tij në rrjetet sociale, ministri Hoxha thekson se gjatë takimit me Komisioneren Kos, i ka bërë të ditur se për Shqipërinë, objektivi mbetet i qartë, të ecim përpara me vendosmëri dhe të mbyllim sa më shumë kapituj negociues të jetë e mundur këtë vit, duke vazhduar të zbatojmë reformat dhe angazhimet.
Postim në X:
Kënaqësi të takohem dhe të bisedoj me Komisioneren e BE-së për Zgjerimin, Marta Kos, në margjinat e Këshillit të Çështjeve të Përgjithshme, që zhvillohet gjatë këtyre dy ditëve në Dublin.
Nuk do të humbasim kurrë asnjë shans për të qenë të pranishëm kudo që flitet për zgjerimin, për të paraqitur modelin e Shqipërisë; dhe kudo që zgjerimi është në axhendë, Marta Kos është aty për ta çuar procesin përpara.
Shkëmbyem mendime mbi dinamikën aktuale të procesit të anëtarësimit, perspektivat e tij dhe, mbi të gjitha, rëndësinë e ruajtjes së ritmit dhe momentumit të negociatave.
Për Shqipërinë, objektivi mbetet i qartë: të ecim përpara me vendosmëri dhe të mbyllim sa më shumë kapituj negociues të jetë e mundur këtë vit, duke vazhduar të zbatojmë reformat dhe angazhimet. Ne mbetemi plotësisht të përqendruar në punën përpara dhe të vendosur për të ruajtur ritmin e negociatave.
Zgjerimi ka të bëjë me meritën, momentumin dhe rezultatin.
Shqipëria është gati për të treja.
