Jonaid Myzyri, i cili katër ditë më parë (30 qershor) u pezullua nga detyra e kryetarit të Komisionit të Prokurimeve Publike, KPP, është paraqitur në GJKKO mëngjesin e kësaj të premteje. Myzyraj pritet të njihet me verifikimin e masës së sigurisë.
Prokuroria e Posaçme kundër Korrupsionit dhe Krimit të Organizuar, SPAK ka kërkuar detyrim paraqitje në policinë gjyqësore, pasi Myzyri është marrë i pandehur javën e kaluar për veprën penale “Shkelje e barazisë së pjesëmarrësve në tendera apo ankande publike”, e kryer në bashkëpunim.
Sipas SPAK, Myzyri dhe shtatë zyrtarë të tjerë kanë favorizuar gjatë një procedure prokurimi një bashkim operatorësh, që kanë depozituar dokumente të falsifikuara.
Jonaid Myzyri e mori detyrën në vitin 2020. Komisioni i Prokurimeve Publike përbëhet nga 5 anëtare, nga të cilët një kryetar dhe një tjetër nënkryetar. Kryetari dhe anëtarët e KPP emërohen nga Kuvendi me propozim të Këshillit të Ministrave për një mandat 5-vjeçar, me të drejtë rizgjedhje vetëm një herë./vizionplus.tv
