Në SPAK po vijon përballja mes Taulant Ballës dhe Jamarbër Malltezit për çështjen “Partizani”.
Balla është pyetur nga avokatët e Sali Berishës se çfarë lidhje ka ky i fundit me dosjen në fjalë. Balla, si kallëzues ka deklaruar se privatizimi dhe ndërtimi në këtë kompleks sportiv është bërë me firmën e Berishës kur ai ka qenë në pushtet.
Pjesë nga seanca:
Klodiana Gjyzari, avokatja e Sali Berishës, pyet Ballën:
Gjyzari: Keni paraqitur një sërë dokumentesh në kallëzim. Ju keni hetuar në lidhje me këtë çështje. Në çfarë gjendjeje ishin ato objekte?
Balla: Ato objekte më dukeshin në gjendje shumë të mirë, pasi ishin rikonstruktuar disa vite më parë.
Gjyzari: Nuk ju kujtohet viti apo subjekti që i ka rikonstruktuar?
Balla: Unë them që ato janë privatizuar; janë privatizuar me vlerë qesharake.
Gjyzari: Sa duhet të ishte vlera sipas jush?
Balla: Unë nuk jam ekspert, por për mua duhet të ishte shumë më tepër, ndoshta dhjetë herë më shumë.
Gjyzari: Kur keni shkuar në vitin 2012 dhe i keni parë në bazë të hetimit 15-vjeçar që keni bërë, pse nuk thoni se kush i kishte në posedim dhe kush i ka privatizuar?
Balla: Unë di që i kishte shteti, por nuk di kush i kishte në posedim.
Gjyzari: A e dini kur është ndërtuar për herë të parë në këto territore dhe kur është dhënë leja e ndërtimit për herë të parë?
Balla: E keni në kallëzimin tim; pas vitit 2011, kur Bashkia e Tiranës drejtohej nga Lulzim Basha.
Gjyzari: Kur është dhënë leja e ndërtimit?
Balla: I pandehuri ka ndërtuar pas vitit 2011.
Gjyzari: Cilat janë procedurat për leje ndërtimi?
Balla: S’kam dijeni.
Gjyzari: Çfarë lidhje ka kryeministri Berisha me njohjen, kthimin dhe privatizimin e pronës?
Balla: Ka firmosur vendimet e Këshillit të Ministrave, sipas dyshimeve të mia, për të gjitha këto faza. I keni edhe në kallëzimin tim.
Genc Gjokutaj: E njihni shtetasin Edi Rama?
Balla: E njoh patjetër. E njoh në mënyrë sistematike.
Gjokutaj: A ke kryer veprime konkrete për të parandaluar procedurën e korrupsionit që pretendoni, a keni kryer veprime për këtë çështje, për këtë leje?
Balla: E kam ngritur këtë çështje në Parlamentin shqiptar. Pastaj kam bërë detyrën time si qytetar, duke bërë kallëzimin.
Balla pyetet nëse ka folur me Ramën përpara se të bënte kallëzimin, apo nëse ka dijeni se ai ka firmosur zhvendosjen e destinacionit.
Gjokutaj: Ka një problem, që ai ka firmosur kthimin e këtij klubi sportiv në terren ndërtimi, është kryetari juaj. Rrëfimi juaj sot bie ndesh me veprimin që ka kryer kryetari i tij.
Balla: As për këtë kallëzim, as për kallëzime të tjera, nuk kam marrë leje nga kryetari i partisë.
