Në Golem ka përfunduar fuqizimi i nënstacionit elektrik, i cili është rritur nga 31.5 megavat në 80 megavat, duke përmirësuar ndjeshëm furnizimin me energji elektrike për gjithë zonën bregdetare nga Golemi deri në Qerret.
Ministri i Infrastrukturës dhe Energjisë, Enea Karakaçi, inspektoi nënstacionin dhe theksoi se ky investim i ri përfaqëson një zgjidhje të rëndësishme për rreth 50 mijë banorë, si dhe për zonat turistike si Mali i Robit, Golemi dhe Qerreti. Sipas tij, rritja e kapaciteteve do të garantojë furnizim më të qëndrueshëm për një zonë me zhvillim të shpejtë urban dhe turistik.
“Ky në fakt është një nënstacion i ri, tek i cili kemi dyfishuar kapacitetin, duke i dhënë një zgjidhje pothuajse përfundimtare të 50 mijë banorëve që furnizon ky nënstacion, duke përfshirë edhe zonat turistike si Mali i Robit, Golemi, por që shkon deri në Qerret për furnizim, por ndërkohë ne nuk jemi ndalur vetëm me këtë nënstacion, pasi OSHEE ka një plan masash edhe për vitin 2026 për këtë zonë”, tha Ministri.
Ka nisur gjithashtu procesi i fuqizimit të nënstacionit të Porto Romanos, i cili do të kalojë nga 50 megavat në gati 100 megavat, ndërsa ekziston edhe një plan për fuqizimin e rrjetit të Spillesë në 20 kilovolt.
“Ne kemi patur gjatë këtyre viteve të shkuara një shqetësim për sa i përket zonës së Spillesë, të cilën vitin e shkuar dhe ne e përfundojmë gjatë kësaj periudhe, ne kemi mbyllur fazën e parë të investimit aty. Është një investim i rëndësishëm, pasi prek zonën ku ne kemi patur probleme pak më të shumta në pjesën bregdetare që kap kjo zona e Adriatikut, por OSHEE ka plan investimesh për ta vijuar në një fazë të dytë këtë investim dhe për të shkuar edhe më tej”, u shpreh Karakaçi.
Sipas Ministrit, të gjitha këto investime janë të rëndësishme jo vetëm për standardet tona, për uljen e humbjeve, por janë të rëndësishme edhe për t’i dhënë një siguri dhe një standard furnizmi shumë të mirë të gjithë banorëve të zonës.
